OwayenguSihlalo weSAA, uDudu Myeni, ushonile

Also Read

 

Former SAA Chairperson Dies

Ukushona kwakhe kuqinisekiswe ngoMgqibelo ngokhulumela i-Jacob Zuma Foundation, uMzwanele Manyi.

"Inhlangano iqinisekisa ngenhliziyo ebuhlungu ukuthi uSihlalo wayo, uDudu Myeni, udlule emhlabeni izolo ebusuku (ngoLwesihlanu). Umndeni usabhekene nalezi zigameko ezibuhlungu futhi ngeke usaphendula imibuzo yabezindaba. Inhlangano icela abezindaba ukuthi bahloniphe isikhundla somndeni,'' kusho uManyi.

Ukushona kukaMyeni kuza ngesikhathi ebhekene nezinsolo zenkohlakalo eNkantolo eNkulu yaseSouth Gauteng eGoli.

Ngesikhathi egcina ukuvela, icala lakhe lenkohlakalo lahlehliselwa uNovemba 21, 2024 ngenxa yokugula.

UMyeni waboshwa ngoSepthemba 2023 kanye nowayenguMqondisi wakwa-IT wakwaSondolo, uMnuz Trevor Mathenjwa ngamacala ahlobene nenkohlakalo yaseBosasa efinyelela ku-R300 000.

Le mali kuthiwa yanikezwa futhi yatholwa njengenzuzo enkampanini ephethe izakhiwo, iBosasa, kanye nenkampani engaphansi kwayo iSondolo IT.

Bobabili badedelwe ngebheyili ka-R10 000.

IKhomishini ephenya ngokuthunjwa koMbuso ithole ukuthi uMyeni, uSihlalo weJacob Zuma Foundation, unecala lokugqugquzela inkohlakalo.

Ithole ukuthi ugqugquzele uZuma ukuthi avune iBosasa.

Umbiko uthi iBosasa, ebandakanyeka “enkohlakalweni yezimboni,” yathola amathenda ka-R2.3 billion kusukela ngo-2000 kuya ku-2016, ikhokha u-R75 million wokugwazela osopolitiki nezikhulu.

UMyeni kuthiwa ubethola intshontsho lika-R300 000 njalo, wayivika iKhomishini, wakhetha ukuthula esikhundleni sokuzibopha.

Ubufakazi obethulwe phambi kwekhomishini buveza ukuthi imali yakhokhwa ngokheshi, kanti iBosasa nayo ixhasa imicimbi yaphinde yafaka nonogada emzini kaMyeni.

UMyeni kusolwa ukuthi wahlela imihlangano phakathi kukaZuma nomphathi weBosasa uGavin Watson futhi waba nesandla ekumisweni kophenyo olubhekene neBosasa, waze wathembisa nokuthi iNational Prosecuting Authority ihoxise icala ababebekwe lona.

IKhomishana iqinisekise ukuthi uMyeni unamandla angakaze abonwe kuZuma, eqhuba imihlangano nezinkampani ezifana neFalcon Oil and Gas, nokwephula uMthethosisekelo kanye nemithetho elwa nenkohlakalo.